The World is Easier When Share Our Ideas
 
الرئيسيةGateاليوميةس .و .جبحـثالأعضاءالمجموعاتالتسجيلدخول

شاطر | 
 

 أبجي وأشكي ياعراق

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
HOLAKOO_AL_3RAQIEE
مدير اقسام منتديات MW CENTER
مدير اقسام منتديات MW CENTER
avatar

عدد الرسائل : 411
العمر : 30
الموقع : http://mwcenter.lifeme.net
تاريخ التسجيل : 05/07/2009

مُساهمةموضوع: أبجي وأشكي ياعراق   الأحد يوليو 12, 2009 11:01 am


دجلة
شبيك يا عراق خضارك صاير أحمر
محتركَـَ بيك اليابس ويا الأخضر
أشوفك على الجرف كل يوم
مليان حزن مليان هموم
جرحك مبين
وطاغي عليك الألم
ودموع عينك تسيل
على خدك دم




العراق
شحجي شسولفلج يا دجلة
كولشي بيا أندار
ولدي مني وبيه
جرحوني وشعلوا النار
والكبار صاروا صغار
والصغار صاروا كبار
ولدي للأسف تغيروا وصاروا أشرار
مفخخات وأرهاب ونار وعواصف
ومنين ما أباوع لابسين حزام ناسف
ما خلوا كنيسة ما خلوا جامع
وكل بيت بيه شهيد
ونوح وبجي وتناهيد
وصراخ من كل صوب سامع



الفرات
حتى المصارين تتعارك بين ضلوعك
تحمل يا عراق وأمسح دموعك
أعذرهم
الوكت غيرهم
والزمن غدرهم
ترى بعد بيك طيبين
وبيك أهل غيرة ومُحبين
ذولة بحبهُم يضون شموعك
تحمل يا عراق وأمسح دموعك


العراق
يا فرات لو يتعاركون
مو مشكلة نكـَدر نصالحهُم
بس ولدي صارو يكـتلون بعضهُم
أخ يقتل أخو وبالفلوس يغرو
والغني يبوكَـو وبعدين يهججو
والفقير يعدمو وبالشارع يذبو
والناس بالفضائيات تتفرج علينا
واليسوة والـ ما يسوة يتشمت بينا
شلون ما أجر حسرات
وشلون ما أبجي دم
والطيبين مثل حالي
بيهم هم يا بو هم

دجلة

جم أوف تتحمل يا عراق
يا زينة الديرة
لا تكَـَول دجلة ما تحس بيه
لو حجايتها صغيرة
صحيح أنة بس أواسيك
بس بيه الألم بكثر ما بيك
وهم بيه حيرة
لكن أعرف كـَلبك بالصبر تاريخ جبير
وأعرف روحك بالحزن حضارة جبيرة
الأمل موجود
ولابد ولدك لأحضانك يعودون
لآن أنت أبوهم ومعلمهم الغيرة

العراق
الله يصبرنا على الـ ديصير
بأدين ولدي يتغير المصير
كولشي يروح فدوة ألهم
ذولة ولدي وهمي همهُم
آه .. آه
لو بس يتذكرون أيام الخير
شلون جانوا ملتمين
شلون جانوا متخاوين
مسلمين ومسيحين
صائبة ويزديّن
نتقاسم الخبزة سوية
وعشرتنا طيبة وهنية
وكَـَلوبهم تنام بيه
ونتنسم بالعبير
وبجناحي أحضنهم
مثل الطير

الفرات
أبجي وأشكي بأحضاني ياعراق
وأرتاح من حسراتك
وبمكان الآه كـَول يا ألله
لابد تـُفرج والصار بيك تنساه

العراق
الأمل بألله جبير يا فرات وغيرة ما عدنا
راضين أحنا لو هاي قسمتنا
نصبر وهم بعد نصبر
بس مرات أكعد وافكر
أكـَولن ليش عن كل العالم تفرق علتنا
وحكـَ تراب الله الـ منها خلقنا
تعبنا هوايا والله تعبنا
مرة مرتين تلاثة تجربنا
رحمتك يا ربي رحمتك
غلطنا أكيد أحنا غلطنا
ما ننكرعلى خيرنا تبطرنا
بس لخاطر الأنبياء
لخاطر السماء
لخاطر الأبرياء
نترجاك وندعيلك
تفرجها و تسامحنا

_________________
تحياتي
HOLAKOO_AL_RAQIEE
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
أبجي وأشكي ياعراق
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
Mw Center :: منتديات الاقسام العامة :: عــراقـي فـي الـمـهجـر-
انتقل الى: